Sandrenna

MELING

Om ikkje for utsjånaden på bygningane, så for det som går føre seg inni dei, er produksjonslokala til Meling, oppe på berget ovanom ferjekaien, eit interessant ­fenomen. Det starta med eit båtbyggeri i 1866. Nå er det femte ­generasjon, Ole Olsen, som driv, men både far hans og to søner er med i drifta. Det er lenge sidan dei laga båtar. I dag er det trapper, dører og glas som er hovudproduksjonen. I tillegg driv dei med restaurering av bygningsdelar som kan brukast opp att. Dei har 15 tilsette og er med det ein av dei største arbeidsgjevarane på Kvitsøy utanom kommunen.

Det er ikkje opplagt at det er god økonomi i å drive ein trevarefabrikk på Kvitsøy. Alle materialar må ­fraktast ut med ferja, og alle kundar er på fastlandet. Men Meling har satsa på kvalitet. «Me bur på ei øy og veit kva eit vêrhardt klima krev», forklarer Ole Olsen, og har kronargumentet for å velja kvalitetsprodukt frå Kvitsøy. Det er ikkje billegast som er hovudsaka hos Meling, det er best.

Stavanger er ein stor marknad, men Meling har og leveransar til nabofylka Hordaland og Agder og lenger enn det, og samarbeider i eit nasjonalt nettverk for å fremje «skreddersydde, helhetlige og eksklusive design i tre, forankra i bærekraft, kvalitet og det aller beste av norsk håndverk».