Meir interessant er kanskje ganske omfattande funn etter forhistorisk busetting, og frå så tidleg som frå 9500 år f. Kr. Langs heile stranda, på nedsida av vegen, er det funne flint som tilseier busetting i eldre steinalder. Her er også funne keramikk som tyder på at det har butt folk her seinare.
Busettingsområdet har nok vore samanhengande, og strekt seg inn over land og under det som nå er Daleveien. Det sentrale busettingsområdet ser ut til å ha vore ovanfor vegen, på ei flate med ein tilhørande heller. Det er fleire hellerar i området både sør og nord for det sentrale funnområdet. Saman med flintfunn og funn av kulturlag, har arkeologane tolka det slik at det her kan ha butt folk over nokså lang tid.
Edellauvskogen vitnar om eit lunt og godt klima. «Eikeskogen vokser seint, men her på østsida av fjorden har den vokst lenge», skriv Tore R. Nielsen, i ein artikkel om området. «Grove stammer og høye kroner forteller om alder og langt liv, og tunge greiner innbyr til klatring og lek». Det kan vera fint å ta ein tur opp i skogen som ei avveksling til solinga, men vil ein lenger er Holmavika også eit utgangspunkt for turar til Dale, Dalsnuten og Eikenuten.
