Kanalen gjennom straumen har nok vore eit viktig samband mellom Mastrafjorden og Byfjorden, og i den gamle soga om Rennesøy prestegjeld frå 1938 påstår forfattarane at den gamle steinbrua over straumen «er visselig en af de eldste broer i landet».
Etter mye strev blei kanalen mudra opp, gamlebrua blei riven, og det blei bygt ny, moderne vippebru over straumen i 1902. Her utvikla det seg eit bygdesentrum. Jakob Finnesand dreiv landhandel med eit assortiment som omfatta både jordbruksvarer, olje og fiskeutstyr, her var posthus og telegraf, og i 1907 blei bedehuset frå Bø i Sørbø flytta hit. I 1939 blei det ein større vekkelse i kretsen som gjorde at det blei behov for eit større bedehus.
Når du i dag kjem til Finnesand er det brygga og parkeringsplassen ved Utstein kloster hotell som er dei naturlege landingsplassane. Herifrå er det eit godt utgangspunkt for besøk både på Klosterøy og Fjøløy, men til Fjøløy er det og lageleg tilkomst frå brygga i Vinnarvika, på vestsida av øya, rett nedom Fjøløy fort, eller frå parkeringsplassen ovanom fyret.
Utstein er både kloster og gard. Klosteret er ope for publikum på nærmare kunngjorde tider, medan garden er ei aktiv landbruksverksemd. Ein del produkt frå garden, og andre stuttreiste varer, blir seld i ein gardsbutikk som er innreia i eit naust rett nedom klosteret.